December 14, 2012
















ఆగని ప్రయాణం

      -------------వారణాసి నాగలక్ష్మి

ఒక మేఘం తడిపేసి పోతుంది
ఒక రాగం కుదిపేసి పోతుంది
గుండెల్లో తడి ఉంటే  ఒక భావం
పాటై పోయి మనసంతా చుట్టేసి పోతుంది !

ఒక మొగ్గ చిగురుల్లో పుడుతుంది
లేతాకుల పొత్తిలి లో సొమ్మసిల్లి నిద్రిస్తుంది
తొలి కిరణం   పిలిచిందంటే
పులకిస్తూ వికసించేసి పరిమళమైపోతుంది !

ఒక తలపు హృదయంలో జనిస్తుంది
మదిలోపల మథనై మమకారమవుతుంది
మమతలతో    పొదరిల్లేసి మధుర
స్వప్నాల ధారలతో రంగవల్లికలల్లేస్తుంది !

ఒక జల సెలయేరై పరిగెడుతుంది
నేస్తాల జతకట్టేసి నది తానై నర్తిస్తుంది
సాగరసంగమానికి సమాయత్తమౌతూనే
వెచ్చని గగన విహారం విలాసంగా సాగిస్తుంది !

ఒక రేఖ చుక్కలుగా విడిపోతుంది
చిరాకు పరాకులతో ఛిన్నాభిన్నమౌతుంది
చక్కని రూపం కోల్పోయి
చిక్కు ప్రశ్నై మిగులుతుంది చిన్నబోయి నిలుస్తుంది!

పుట్టిన ప్రతిజీవీ ప్రయాసకు లోనౌతుంది
తనదైన ప్రయాణాన్ని తపిస్తూ సాగిస్తుంది
ముందుకు పోతున్నట్టు భ్రమిస్తూ
ఆగని చక్రభ్రమణంలో ఆత్రంగా పాల్గొంటుంది !


(కౌముది లో వెలువడిన నా కవిత)

No comments:

Post a Comment